Bioskoop Word Tien Jaar Oud
ʼn Bioskoop Dekade
Die idee van Bioskoop het aan die einde van 2014 ontstaan nadat ek om mediese redes nie meer as vlieënier kon werk nie. Nadat ek my hand aan ʼn paar velde probeer het, het ek besef ek moet fokus op iets waarvoor ek ʼn passie het. Naas vlieg was flieks my grootste liefde. Dit het begin toe ek tydens my hoërskooljare videos vir die skool se sportspanne gemaak het. Ek het dus met die idee begin speel om meer oor die rolprentbedryf te leer. Terselftertyd vra ‘n vriend, Ruben Scheepers, my of ek myself wil leer om webtuistes te skep sodat ek een vir die nie-winsgewende organisasie Straatlig (Nou Stellenthombo) kan skep. Ek pak toe die uitdaging aan en maak ‘n paar rand nadat ek suksesvol Straatlig se webtuiste geskep het.
Tydens my navorsing oor die Suid-Afrikaanse rolprentbedryf kom ek agter dat daar min webtuistes is wat inligting oor die bedryf verskaf. Dié wat daar wel was (soos Screen Africa en The Callsheet) was slegs in Engels beskikbaar. Dus skep ek Bioskoop met die doelwit om ʼn leemte te vul.
Bioskoop se eerste resensie was vir die rolprent Ballade vir ‘n Enkeling (2015). Stephan Meyer was gaaf genoeg om dit te skryf. In April 2015 het ek Anna-Marie Jansen van Vuuren genader om by die span aan te sluit. ʼn Voormalige skoolvriendin, Melissa Tighy, het saam met haar by RSG se nuusaktualiteitspan gewerk, en haar aanbeveel omdat sy ʼn kundige op die gebied van die Suid-Afrikaanse rolprentbedryf was. Ten spyte van haar hoë werkslading, wat vryskut werk by RSG nuusaktualiteit, klasgee werk by die Universiteit van Johannesburg, en haar PhD-studies ingesluit het, het sy ingestem om deel te word van die span. Sy het verskeie onderhoude met Suid-Afrikaanse rolspelers en stories oor plaaslike rolprente verwerk om te eerste nuusartikels te word wat op die webblad geplaas is.
Daarna het die span gegroei, met Dee Theart wat eers as teksredigeerder aangesluit het, en toe die webisodes haar eie stem gegee het. Ander wat kort daarna by die span aangesluit het was Martie Bester, Gerhard Ehlers, Roelof Bezuidenhout, Johan Jansen van Vuuren en J.W. Hurter wat aangesluit het. Ongelukkig draai ʼn mens se lewe maar in verskeie paadjies af, en het van hierdie lede intussen afskeid geneem weens ander werksverpligtinge.
Die span wat egter steeds trots agter die stuur van Bioskoop staan is: Rick Bronkhorst, Anna-Marie Jansen van Vuuren, Dee Theart, Gerhard Ehlers, Roelof Bezuidenhout en Justin Yoko. Yoko doen die meeste van die verfilmingswerk van die webisodes, veral tydens die jaarlikse Silwerskermfees.
Nou is Bioskoop ‘n volle tien jaar oud. ‘n Dekade van Suid-Afrikaanse flieknuus, onderhoude en resensies. Ons het intussen agtergekom dat baie skoolleerlinge die webtuiste vir hul take gebruik en natuurlik geniet rolspelers uit die bedryf ook ons inhoud, en hulle lig ons gereeld in as hulle nie met ʼn resensie saamstem nie. Ons glo as Bioskoop om die bedryf op te bou, maar ons resensente het die vryheid om hul mening (en kritiek) oor rolprente te lig, aangesien dit die enigste manier is waarop ʼn mens kan groei en debat kan kweek.
En wat het van my rolprentdrome geword? Nadat familie en vriende my gehelp het om my eerste jaar van my BA Film-en-TV produksie graad te betaal, het ek besef hoe nodig dit is om ʼn organisasie te stig wat ander studente kan steun wat sukkel om hul studies te finansier. Dus het ek die span gevra of ons Bioskoop as nie-winsgewende organisasie (NWO) kan registreer. In 2019 het ons die nie-winsgewende organisasie gestig en vandag werk ons daaraan om as Openbare Weldaadsorganisasie (PBO) te registreer. Die doelwit daarvan is om fondse in te samel vir minder bevoorregde Suid-Afrikaanse filmstudente – wat alle demografieë insluit. Ek het ook intussen my graad voltooi en ʼn hele paar webblaaie ontwikkel, soos onder meer www.rimacon.co.za
Tans word daar hard aan ons nuwe webtuiste by www.bioskoop.org gewerskaf. Hierdie webblad sal in Afrikaans en Engels beskikbaar wees. Ons het besluit om Engels as voertaal by te voeg sodat ons ook hierdie inligting oor die Suid-Afrikaanse Filmbedryf aan internasionale lesers beskikbaar te maak.
Om ‘n bydrae tot die NWO te maak, of om meer daaroor uit te vind, stuur gerus vir ons ‘n e-pos by dir@bioskoop.org of ‘n WhatsApp-boodskap by +27723570605.
Rick Bronkhorst & Anna-Marie Jansen van Vuuren
Medestigters & Direkteurs
Boodskappe vanaf Die Span
Dee Theart
‘n Dekade is ‘n lang tyd en Bioskoop het die toets van tyd weerstaan – baie geluk! Dis ‘n groot lekkerte om deel van die span te wees en Afrikaanse films te kan vier en op die voorgrond te plaas. Daar was vele hoogtepunte die afgelope 10 jaar. Uitstaanoomblikke is geselsies op die rooi- en bloutapyte met ons land se blinkste sterre en legendes. Ek dink veral terug aan die nederigheid van ikone soos Sandra Prinsloo, Tobie Cronjé, Marius Weyers en die wyle Shaleen Sirtie-Richards en Gerrit Schoonhoven. Ons sien uit om nog baie Afrikaanse filmhoogtepunte te kan vier en in die kollig te plaas op bioskoop.co! 📽️
Gerhard Ehlers
Veels geluk liewe Bioskoop omdat jy verjaar mag die movies ons aanraak en nog baie jare spaar!Hip,hip Hoerah!En saam met die groot geluk Afrikaans wat op 9 Mei amptelik 100 jaar oud is. Bioskoop: Afrikaans se agterkleinkind. 👏🏻👏🏻🥳
Roelof Bezuidenhout
Baie geluk aan die hele Bioskoop.co-span met jons 10de bestaansjaar! 🎉 Dis hoe lank Bioskoop.co al met passie en toewyding die Afrikaanse filmbedryf ondersteun en bevorder. Ons as span is ongelooflik trots op en dankbaar vir ons leier en stigter, Rick Bronkhorst, wie se visie en harde werk hierdie platform moontlik gemaak het. Mag die volgende dekade net nog meer sukses en groei bring – ons sien uit na nog baie jare van insiggewende nuus, resensies en video’s wat die bedryf en publiek verryk! 🎬✨
Justin Yoko
I became aware of Bioskoop too late to start my journey with them on the ground floor. Yet, once I found out about the platform and what they wish to achieve with it, I knew I had to get involved somehow. Even though Afrikaans is not my first language, I thought the idea and the spirit of Bioskoop was something to behold. The goals that have been set out for Bioskoop excite me like nothing else really. I know if Bioskoop only achieves 10% of what it wishes to, it will truly help change lives.
More News
The Fix – Hierdie fliek is dalk net die “fix” wat jy nodig het
In ‘n distopiese samelewing is die lug toksies en neem die model Ella (Grace van Dien) ‘n verbode (ontwerper-) dwelm by ‘n partytjie, wat tot ‘n skokkende fisiese verandering lei. Terwyl sy deur ‘n gevaarlike bende en die owerhede gejaag word, ontdek sy dat haar mutasies dalk die sleutel tot die oorlewing van die mensdom kan wees.
The Fix – Hierdie fliek is dalk net die “fix” wat jy nodig het
In ‘n distopiese samelewing is die lug toksies en neem die model Ella (Grace van Dien) ‘n verbode (ontwerper-) dwelm by ‘n partytjie, wat tot ‘n skokkende fisiese verandering lei. Terwyl sy deur ‘n gevaarlike bende en die owerhede gejaag word, ontdek sy dat haar mutasies dalk die sleutel tot die oorlewing van die mensdom kan wees.
The Fix – Hierdie fliek is dalk net die “fix” wat jy nodig het
In ‘n distopiese samelewing is die lug toksies en neem die model Ella (Grace van Dien) ‘n verbode (ontwerper-) dwelm by ‘n partytjie, wat tot ‘n skokkende fisiese verandering lei. Terwyl sy deur ‘n gevaarlike bende en die owerhede gejaag word, ontdek sy dat haar mutasies dalk die sleutel tot die oorlewing van die mensdom kan wees.
Courses
Acting
Directing
Sound
Cinematography
Producing